Ibitekerezo twahawe n’abakobwa, twabishyikirije umusizi Ange Uwamahoro, maze adukorera umuvugo yise Turi Ni Nyampinga”.

Witubariririza iyo mu mpinga Reka tukwibwire turenze impinga Kuko twe turi Ni Nyampinga!

Twuje Inzozi zirenga impinga Dufite umwete urenga impinga Umurava wacu ukarenga impinga Ibigwi byacu bikarenga iyindi Ibitekerezo bizima bitatse impinga N’urukundo mu mitima rugera impinga

Ibyo si ibanga Turi Ni Nyampinga Dufite ikizere Icyo kituranga Ikerekezo Ibitekerezo Amaboko, umutuzo Duhagarara twemye Dutambuka gitware Turazamurana Turamurika Turi indashyikirwa Turi Ni Nyampinga

Ibyo turabizi Twe Turi Ni Nyampinga Tuberwa na byinshiiii! Umunezero Amahoro Ejo heza N’ibindi. Si ibanga turi abahanga Si ibanga twiteza imbere Si ibanga turisanzuye Si ibanga nta mususu Turitonze Turiga Turigisha Turi abanyakuri Turi ab’agaciro Turashoboye Turarangururaaa! Turi Ni Nyampinga! Twe turi Ni Nyampinga! Ibigeragezo turabinesha Tugakosorwa iyo dukosa Ikosora kuri twe isomo Turaruhuka ntitunebwa Tugera ku ntego ntiturutwa Dukura imitego ntidutegwa Dutsinda ibitego ntidukomwa Twe turi Ni Nyampinga!

Dutanga urugero Turamurika Turatsinda Tureba kure!

Turi ikitegerezo ku bato iwacu Indangagaciro izo ni zo zacu Ni twe ba mbere mu kumenya ibyacu Iyo ducecetse si ubucucu Tuba ducocagura ibiduca intege Tuba turota Tuba dutega Tuba duteganya Tuba tuzigama Tukishyira hamwe, Tukiranga Turi Ni Nyampinga!

Igihe nyacyo Mbaraga nyazo Mahitamo nyayo Bushake nyabwo Cyo dushaka nyacyo Nk’urubyiruko nyarwo! Kwimenya koko Kwiyemeza koko Nka Ni Nyampinga koko!

Ni byo koko, Twe turi Ni Nyampinga! Inshuti zacu Turazikunda Turazirinda Tukidagadura Turafashanya Tukajya inama Ukuri kwacu kukaturanga!

Ejo hazaza aho dufite intebe Mu gihugu cyacu mu rwa Gasabo Aho ba Mama aba baturinda Aho ba Data aba badukunda Aho abarezi bacu batwizera Turashyigikiwe twe Ni Nyampinga!

Twe turi Ni Nyampinga! Turamurika urwererane rugasesa Turamurika umwijima ukaduhunga Umunezero ukaboneka Ubuzima bukaryoha Kuko dufite umwihariko Dufite umurava Turi ab’agaciro Dufite agaciro Twiha agaciro Turi Ni Nyampinga, Ni impamo koko; Twe turi Ni Nyampinga!